O Concello de Ribas de Sil vai instalar estufas de biomasa (pellets) nos Centros Sociais de San Clodio, Peites e Nogueira e na Aula de Pesca, cunha inversión total de 5.251,40 €. A inversión consiste en dotar de equipamentos térmicos de biomasa ¿ fonte de enerxía renovable - para os locais indicados, os cales non dispoñían de sistemas de calefacción. O proxecto financiarase nun 80 % do orzamento total con cargo á subvención concedida polo Instituto Enerxética de Galicia (INEGA), ao abeiro da Resolución do 14 de marzo de 2017 (DOG núm. 68 do 22 de marzo de 2017). A actuación está cofinanciada polo Fondo Europeo de Desenvolvemento Rexional, no marco do programa operativo Feder-Galicia 2014-2020.